Deepa N
Zyxware Technologies Pvt. Ltd
കുഞ്ഞു ദൈവം
ആർത്തവമുള്ളോരമ്മതൻ മാറിൽ
ചേർന്നുറങ്ങുന്നൊരു കുഞ്ഞുദൈവം
കോർത്തൊരു പൂമാലപോൽ കരങ്ങൾ
ചാർത്തി തന്നമ്മതൻ പൊൻകഴുത്തിൽ
കോമളഭാവമാർന്നീശരൂപം
അമ്മയ്ക്ക് കണ്ണിന്നു പൊൻകണിയാം
ലോകമഖിലവും കൈവെള്ളയിൽ
തൂമയിൽപ്പീലിയായ് വീണപോലെ
പാൽമണം ചോരുമാ പുഞ്ചിരിയിൽ
പൂതനമാരോ ഭയന്നിരിക്കാം
പിഞ്ചു കാൽപാദങ്ങൾ പിച്ചവയ്ക്കേ
കാളിയനോ തലതാഴ്ത്തി നിൽക്കാം
നന്മവിളക്കു തെളിച്ചവർക്കോ
വാത്സല്യപൂരം കാണായ്വരും
കണ്ണനെ ഉള്ളാൽ സ്മരിച്ചിരിക്കെ
കണ്ണിന്നു മുന്നിൽത്തെളിഞ്ഞപോലെ
നന്മതൻ മൂർത്തിമത്ഭാവമല്ലോ
അമ്മയുപാസിക്കും കുഞ്ഞുദൈവം
നിർമ്മലസ്നേഹവിശുദ്ധിയാലേ
ശ്രീലകം പൂകുന്നിതമ്മയെന്നും
കേവലമാനവചിന്തകളിൽ
പാരം അശുദ്ധികലർന്നിരിക്കാം
സ്നേഹം വ്രതമായറിഞ്ഞവർക്കേ
വിശ്വാസത്തിൻ്റെ പൊരുളറിയൂ!