Skip to main content
Srishti-2022   >>  Poem - Malayalam   >>  രണ ഭേരി

രണ ഭേരി

പൊരുതുക നാം ഇതിലെ, വഴി വെട്ടത്തിൽ 

തളരരുതേ , അരുതേ, നോവുകളിൽ 

കരകയറും നമ്മളീ കരകാണാ കണ്ണീർ 

കയത്തിൽ  നിന്നും ,വിജയ ഭേരി മുഴക്കി 

 

പ്രളയത്തെ ചെറുത്തു നമ്മൾ തോൽപിച്ചു, ഒറ്റക്കെട്ടായി 

പേമാരിതൻ താണ്ഡവത്തിൽ കടപുഴുകാതെ നാം നിന്നു 

ജാതിയും , വർണ്ണവും ,മതഭ്രാന്തിൻ  വേലികെട്ടും 

തകർത്തെറിഞ്ഞ പുതിയൊരു മാനവ വിപ്ലവം.

 

ഇറങ്ങി വന്നു ദൈവം നാട്ടിൽ 

ഉരുക്കിൻ പടച്ചട്ടയുമായി ,

ഇരുണ്ടു നിന്നാ കണ്ണീർ കണങ്ങൾ 

തുടച്ചു വിണ്ണിൽ ഉയർത്താനായി 

 

തരിച്ചു നിന്നു വിണ്ണും ,മണ്ണും, കടലിൻ-

യോദ്ധാക്കളിൻ രണ വീര്യം കണ്ട് 

പതുക്കെ മാളത്തിൽ ഒളിച്ചു അഭിനവ -

ശകുനിയും ,യൂദാസുമാരും.

 

മൃതിയടയും ഭൂമിയെ കാക്കേണ്ടതുണ്ട്,

പൊരുതേണം ഒത്തു നാം ഇനിയും മണ്ണ് കാക്കാൻ 

കരകയറും നമ്മളീ കരകാണാ കണ്ണീർ 

കയത്തിൽ  നിന്നും ,വിജയ ഭേരി മുഴക്കി