'പ്രധാന പ്രതി ഒളിവിലാണ്'

വീട് നിറയെ ആൾക്കാരാണ് പലരും പലമൂലയ്ക്കിരുന്നു താടിക്ക് കൈകൊടുത്തു അപലപിക്കുന്നുണ്ട്. ചർച്ചകൾ കൊടുംപിരി കൊള്ളുന്നൊരു  മുറിയിലേക്ക് അബദ്ധത്തിൽ ചെന്ന് കേറി അവിടെയും ഞാനാണ് പ്രതി കഷ്ടപ്പെട്ട് വളർത്തിയ അമ്മയെയും സഹോദരനെയും ചതിച്ചും പൊന്ന് പോലൊരു ചെറുക്കന്റെ ജീവിതം നശിപ്പിച്ചും കടന്ന് കളഞ്ഞവൾ... അപൂർവം ചില സുഹൃത്തുക്കൾക്കിടയിൽ മാത്രമാണ് എനിക്കൊരു നല്ല ഇമേജ് കിട്ടുന്നത് എന്നാലും അവരവസാനം ഞാനെടുത്ത തീരുമാനത്തെ കുറ്റപ്പെടുത്തി തന്നെയാണ് അവസാനിപ്പിക്കുന്നതും. ജീവിതത്തിൽ ഇന്ന് വരെ നേരിൽ കാണുകയോ സംസാരിക്കുകയോ ചെയ്യാത്തവരോട് പോലും എന്റെ കാര്യത്തെപറ്റി പറയുന്നത് കേട്ട് ശരിക്കും ഒരുപാട് ചിരിച്ചു. ചില നാട്ടുകാർ എന്റെ മാറിയ വസ്ത്രധാരണം കണ്ടപ്പോഴേ ഊഹിച്ചിരുന്നത്രെ എന്റെ പോക്ക് ശരിയല്ലെന്ന്. ഒരുപാട് സംസാരിക്കുന്നത് കണ്ടിട്ട് പലർക്കും തോന്നിയിരുന്നു ഒന്നാതരം പിഴയാണെന്ന്. എതിർത്തു സംസാരിക്കുകയും സ്വന്തമായ് തീരുമാനമെടുക്കുകയും ചെയ്ത് തുടങ്ങിയപ്പോൾ മുതൽ കാർന്നോമ്മാരുടെ ശാപവും ഏറ്റുവാങ്ങിയതല്ലേ പിന്നെങ്ങനെ ഞാൻ നന്നാവും. അമ്മയോട് മാത്രമാണ് തെറ്റ് ചെയ്‌തെന്ന് തോന്നുന്നുള്ളൂ പക്ഷെ അവരുടെ എടുത്തുചാടിയുള്ള വിവേക മില്ലാത്ത പെരുമാറ്റം കൊണ്ട് തന്നെയാണ് എനിക്കീ ഗതി  വന്നതും കുറ്റപ്പെടുത്താൻ അവകാശമില്ലെങ്കിലും സങ്കടം പറയാല്ലോ. കൂടെപ്പിറപ്പും കൂട്ടുകാരും സ്വന്തം ജീവിതത്തിൽ മുഴുകുമ്പോൾ എളുപ്പം മറക്കും. താലി തന്നതൊരു ഔദാര്യമായി കണ്ടവനിതൊരു ലോട്ടറിയാണ് യാതൊരു ചിലവുമില്ലാതെ ഒഴിവാക്കപ്പെട്ടിരിക്കുന്നു.

എനിക്കെന്നെ നഷ്ടപ്പെടാൻ കാരണമായവർ ഒരുപാടുണ്ട്

ചിലർക്ക് പൂക്കൾ നുള്ളിയെറിയാൻ മാത്രമേ കഴിയൂ ഒരു ചെടി നട്ടു നനച്ചു കാത്തിരുന്നു മൊട്ടിടുന്നതും പൂവിടുന്നതും ഒടുവിലത് കൊഴിഞ്ഞു മണ്ണടിയുമ്പോൾ മുഖത്തെ പുഞ്ചിരി മായുന്നതും അടുത്ത മൊട്ടിനായി കാത്തിരിക്കാനും കഴിയുന്നവരാകാണാമെങ്കിൽ കാത്തിരുന്നു പ്രതീക്ഷിച്ചും ജനിച്ചവരാകണം അല്ലാതെ അബദ്ധം പറ്റിയുണ്ടായാൽ പോരാ.

എന്നും തോറ്റു പോയവളുടെ എടുത്ത തീരുമാനങ്ങളിൽ കാലിടറി പോയവളുടെ അപമാനവും ആട്ടും തുപ്പും സഹിച്ചു അഭിമാനം നഷ്ടപ്പെട്ടവളുടെ പ്രിയപ്പെട്ട തെറ്റായിരുന്നു ഈ ആത്മഹത്യാ, തന്റെ മാത്രം ശരിയിൽ ഉറച്ചു നിന്ന് കൊണ്ട് ജീവിക്കാനുള്ള ഒരുപാട് മോഹങ്ങളെ ബലി കഴിച്ചു കൊണ്ട് ഈ നശിച്ച ജന്മത്തിൽ നിന്നും രക്ഷപെട്ടവൾ. ചിലരൊക്കെ ആശ്വസിക്കുന്നത് പോലെ ഞാനല്ല യഥാർത്ഥത്തിൽ പ്രതി  യഥാർത്ഥ പ്രതി ഇപ്പോഴും ഒളിവിലാണ്.