Babitha Babu
UST Global
മംഗല്യയോഗം
എനിക്ക് മംഗല്യ യോഗമായി എന്ന് ഞാൻ അറിഞ്ഞത് അച്ഛന്റെ മുഖത്ത് നിന്നായിരുന്നു.. നെറ്റിയിൽ കൂടുതൽ ചുളിവുകൾ.. മുഖത്ത് ചിരിക്കു പകരം ടെൻഷൻ .. ഞാൻ അച്ഛന്റെ രാജ കുമാരിയായിരുന്നു.. അച്ഛന്റെ ഭാഗ്യം.. അത് കൊണ്ട് തന്നെ അച്ഛൻ എനിക്ക് വേണ്ടി തേടിയത് ഒരു രാജകുമാരനെ ആയിരുന്നു..
പക്ഷെ അമ്മ വിലക്കി കൊണ്ടിരുന്നു.. ഓരോ ആലോജന വരുമ്പോഴും അമ്മ ചോദിക്കും.. "ഇത് നമുക്ക് വേണോ, നമ്മുടെ കൊക്കിലൊതുങ്ങുന്ന ഒരു ബന്ധം പോരെ ? രാജകുമാരനെ തേടിപോയാ നമ്മുടെ മോളവിടെ വേലാകാരിയായി പോവില്ലേ "
അപ്പൊ അച്ഛൻ അഭിമാനത്തോടെ പറയും, " അതിനു ഞാനെന്റെ മോളെ കയ്യും വീശി പറഞ്ഞയക്കില്ല"
അമ്മ നിശബ്ദയാവും..
ഒടുവിൽ അച്ഛൻ കണ്ടെത്തി എന്റെ രാജകുമാരനെ.. അച്ഛൻ ആഗ്രഹിച്ച പോലെയുള്ള കുടുംബം.. ഞാൻ ആഗ്രഹിച്ച പോലെയുള്ള പയ്യൻ.. സന്തോഷത്തിന്റെ നാളുകൾ.. പക്ഷെ അമ്മയുടെ മുഖത്തെ വേവലാതി തീര്ന്നു കണ്ടില്ല.. ഒരു പുഞ്ചിരി പോലും കണ്ടില്ല..
പതിയെ പതിയെ അച്ഛന്റെ സന്തോഷവും മങ്ങിത്തുടങ്ങി.. സംസാരം കുറഞ്ഞു.. ഭക്ഷണം കുറഞ്ഞു.. വീട്ടിലേക്കു വരുന്നതെ കുറഞ്ഞു.. എന്താണ് സംഭവിക്കുന്നതെന്ന് മനസിലാവുന്നതെ ഇല്ലായിരുന്നു..
പിന്നെ എനിക്ക് കാര്യം മനസിലായി.. രാജകുമാരന്റെ അച്ഛന്റെ പാന പാത്രം നിറക്കാൻ നെട്ടോട്ടമോടുകയാണ് എന്റെ അച്ഛനെന്നു.. ഈ വിവാഹം എനിക്ക് വേണ്ടെന്നു ഞാൻ പറഞ്ഞു.. പക്ഷെ അച്ഛന് വാശിയായിരുന്നു.. അച്ഛൻ പരിശ്രമിച്ചു കൊണ്ടേയിരുന്നു.. ഒടുവിൽ, എല്ലാ പരിശ്രമങ്ങൾക്കും ശേഷം അച്ഛനത് പൂർത്തിയാക്കാൻ പറ്റി..
അന്ന് വൈകീട്ട് അച്ഛൻ നേരത്തെ വീടിലെത്തി.. സ്വൊരുകൂട്ടിയ പണമെല്ലാം മേശമേൽ വെച്ച് അമ്മയെ വിളിച്ചു.. നിറ കണ്ണുകളോടെ അമ്മയുടെ നെറ്റിയിൽ ചുംബിച്ചു.. എന്നിട്ട് പറഞ്ഞു, "നിന്റെ അച്ഛന്റെ രക്തമായിരുന്നു ഞാൻ കൈനീട്ടി വാങ്ങിയതെന്ന് ഞാൻ ഇപോഴാണ് അറിയുന്നത്.. എന്നോട് ക്ഷമിക്കണം.."
ഞാൻ എന്റെ ജീവിതത്തിൽ കണ്ട ഏറ്റവും നല്ല കാഴ്ച ആയിരുന്നു അത്.. അതിന്റെ മനോഹാരിതയോടെ ഞാനെന്റെ രാജകുമാരനെ വിളിച്ചു പറഞ്ഞു, എനിക്കൊരു മനുഷ്യനെ വിവാഹം ചെയ്യാനാണ് താല്പര്യം എന്ന്.. ഒരു നിമിഷത്തെ നിശബ്ദതക്കു ശേഷം ഫോണ് കട്ട് ആയപ്പോൾ, അമ്മയുടെ മുഖത്ത് ഞാൻ ആദ്യമായി പ്രണയം കണ്ടു.. അച്ഛന്റെ മുഖത്ത് മനുഷത്വവും..