ഇന്നലെപ്പെയ്ത മഴക്കുമുളച്ചൊരു

കാട്ടുതകരതൻ പാഴ്ചെടിയല്ലിവൾ

വേദേതിഹാസപുരാണങ്ങളാധാര-

മായൊരു സംസ്കൃതവൃക്ഷമീ ഭാരതി

എല്ലാമതസ്ഥരുമൊന്നിച്ചു വാഴുന്ന

പുണ്യസ്ഥലമാണ് ഭാരതമണ്ഡലം

പാരതന്ത്ര്യത്തിന്റെ ചങ്ങലപ്പൂട്ടുകൾ

ആറുപതീറ്റാണ്ടു മുൻപേ തകർത്തിവൾ

വിശ്വം നമിക്കുന്നിവളുടെ കാൽകലായ്

വിശ്വം ഭരിക്കുവാൻ പ്രാപ്തയാണിന്നിവൾ

ആരോടുമിന്നിവൾക്കില്ലാ പരിഭവം

മാനവസേവന മന്ത്രം മുഴക്കുവോൾ

ഭീകരവാദികൾക്കാവില്ലൊരിക്കലും

മുള്ളുവിതറുവാനീവഴിത്താരയിൽ

ഒരു തളിർ നുള്ളിയാളായിരം നാമ്പുകൾ

പൊട്ടികിളിർക്കും വടവൃക്ഷമാണിവൾ

നാളെയീഛായയിൽ സായുജ്യമാർന്നിടാൻ

വിശ്വം മുഴുവനുമെത്തിടാൻ വെമ്പിടും

അവളെത്തടുത്ത കരം തടഞ്ഞീടവെ

ജീവൻ വെടിഞ്ഞ സഹോദരാ കൂപ്പുകൈ

കോടികൾ ഞങ്ങളിതാ നിന്റെ ധീരത

കണ്ടൂനമിക്കുന്നു ഗദ്ഗദകണ്ഠരായ്

കോടികൾ ഞങ്ങളിതാ നിന്റെ ധീരത

കണ്ടൂനമിക്കുന്നു ഗദ്ഗദകണ്ഠരായ്

ഇല്ലാനിനക്കു മരണം സഹോദരാ

എന്നൂമമരനായ് വാണീടും ഞങ്ങളിൽ

ഞങ്ങൾതൻ ജീവിതപാതയിൽ നീയൊരു

ഭാസുരദീപമായ് കത്തിജ്വലിച്ചിടും.