Vineeth Krishnan
Infoblox
വേരോർമകൾ
വേരുകൾ തേടിപ്പോകരുത്;
വേരുകൾക്ക് മരണമില്ലത്രേ
അത് പടർന്ന് പടർന്ന് പാതാളത്തോളം ചെല്ലും
പാതാളം താണ്ടിയത് ശൂന്യതയിലേക്കും കടക്കും
ജനിച്ചാലുടൻ വേര് മുറിച്ചു കൊള്ളുക
പ്രപഞ്ചത്തോളം പ്രായമുള്ളൊരറുപഴഞ്ചൻവേരിന്റെ ഇങ്ങേയറ്റമാണത്
ഇനിയൊരാവശ്യവുമില്ലാത്ത വെറുമൊരു പിടിവള്ളിക്കഷ്ണം
പഴയ ഓർമകളുണ്ടാവാനാണത്രേ
വയറ്റിൽ പ്രപഞ്ചത്തോളം ചെറിയൊരു പൊക്കിൾക്കൊടിച്ചുഴി
ചുഴിഞ്ഞു ചുഴിഞ്ഞു പോയാൽ
ആ പ്രപഞ്ചത്തോളം തന്നെ പഴയൊരോർമ ഭയപ്പെടുത്തും;
ആദിമവേരിന്റെ ഓർമ
പണ്ടൊരാൾ ആ വേര് -തേടിപ്പോയങ്ങേത്തലയോളം ചെന്നെത്തിയത്രേ!
ഓർമകളിലയാൾ ഭയപ്പെട്ടില്ലത്രേ!
പകരം പുഞ്ചിരിച്ചുകൊണ്ടേയിരുന്നു
ഭയപ്പെട്ടത് മുന്നിലുള്ള വലിയ ലോകമാണ്
ഭയമാകകൊണ്ട്തന്നെ ലോകമയാളെ ദൈവമെന്ന് വിളിച്ചു;
ബുദ്ധനെന്ന് വിളിച്ചു
അന്തമില്ലാത്ത ഓർമ്മകളുടെ വേരിന്റെ
രണ്ടറ്റവും കൂട്ടിക്കെട്ടിക്കൊണ്ടയാൾ പറഞ്ഞു ;
നോക്കൂ..,
ഈ ചക്രം
ഈ കാണുന്ന ധർമചക്രം,
ഇതാണ് സത്യം
ശുദ്ധം
ശൂന്യം
ഇതറിഞ്ഞവൻ ബുദ്ധൻ
ഇതറിഞ്ഞവൻ മാത്രം ബുദ്ധൻ