നിറവേറ്റി പല കടമകൾ ദൗത്യങ്ങളേറെ,

അറിവുകളുമില്ലിനി നൽകാൻ, ജീവനുമില്ല ഓജസുമില്ല.

അലസമായ് അലയുന്നിനി ആകാശഗംഗയിൽ,

അഴുകുന്നില്ല പഴകുന്നില്ല മായുന്നില്ലിനി.

ദൂരങ്ങൾ താണ്ടിയെത്രയും ഇങ്ങെത്താൻ,

അത്രയും താണ്ടണം കൂടണയാൻ.

ധരയാം മടിത്തട്ടിലിടമില്ലിനി എറിയാൻ,

കുമിയുന്നൊരു കുന്നായ് മലയായിനി ഇവിടെ.

ജയിക്കുന്നതാരിനി ശാസ്ത്രമോ? അഹന്തയോ?

ആരവങ്ങൾ കരഘോഷങ്ങളെല്ലാം മാഞ്ഞു,

ആശങ്കകൾ മാത്രമായിനി.

ഉയരങ്ങൾ താണ്ടിയ അറിവിന്റെ പ്രതീകമേ,

ഇപ്പോൾ നീ വെറും ഭീഷണവസ്തു

**ആയിരത്തിലേറെ കൃത്രിമ ഉപഗ്രഹങ്ങൾ പല കർത്തവ്യങ്ങളുമായി ഭൂമിയെ വലം വെയ്ക്കുന്നു. ഓരോ കൃത്രിമ ഉപഗ്രഹങ്ങളുടേയും കാലാവധി കഴിയുമ്പോൾ അവയ്ക്ക് എന്ത് സംഭവിക്കും? എന്ന് നമ്മൾ ചിലരെങ്കിലും ചിന്തിച്ചിട്ടുണ്ടാകും. ഈ വിഷയം ആസ്പദമാക്കി രചിച്ച കവിതയാണ് ഭീഷണവസ്തു.