തുളസിത്തറയിൽ തിരി തെളിച്ചൊരാ-

മുത്തശ്ശി ഉമ്മറത്ത് വന്നെന്നോട്,

"ത്രിസന്ധ്യനേരം മയങ്ങുന്ന കന്യക

നാടിനും വീടിനും ശാപം!"

എന്താണ് ശരി?

ആർത്തവനേരം സ്വാമിയാം അച്ഛനെ

തേടി നടന്നപ്പോൾ അമ്മ എന്നോട്,

"പാടില്ല സ്വാമിയെ തൊട്ടു തീണ്ടുവാൻ,

മഹാപാപം! അശുദ്ധം!"

എന്താണ് ശരി?

യാത്രക്കിറങ്ങുമ്പോളാ കരിമ്പൂച്ച

പാഞ്ഞത് കണ്ടെൻ അച്ഛൻ,

"ഇനിയിന്നു വേണ്ട, ഈ നശിച്ച

നേരം ആപത്തു സുനിശ്ചിതം!"

എന്താണ് ശരി?

ജാതകം നോക്കി തലകുനിച്ചു

ജ്യോൽസ്യൻ എന്റെ പ്രിയപ്പെട്ടവരോട്,

ചൊവ്വാദോഷം! ഇനിയീ ജന്മം

വിവാഹം കഠിനം! മുജ്ജന്മപാപം!

എന്താണ് ശരി?

തേടിയിറങ്ങി ഞാനെൻ ശരികളെ

അന്ധമാം മൂടുപടങ്ങളെ ഛേദിച്ചു

തേടിയിറങ്ങി ഞാൻ മാറ്റങ്ങങ്ങളെ

എന്നിലെ ഞാൻ എന്നോട്, "ഞാനാണ് ശരി!"