Shine Shoukkathali
EY Kochi
മുറിഞ്ഞ തൂവൽശേഖരം
ഗവേഷകന്റെ തൂവൽശേഖരത്തിൽ
വിചിത്രമായതൊന്നുമില്ല;
എല്ലാ പക്ഷികളുടെയും
അടുക്കിപ്പെറുക്കിയ
ഓരോ തൂവലുകൾ മാത്രം.
മയിൽപീലിയും കാക്കത്തൂവലും
ഇഴ ചേർന്ന ശേഖരം;
കൂട്ടത്തിൽ അപൂർവ്വമായ
ഫീനിക്സ് പക്ഷിയുടെ തൂവലും .
തലനാരിഴ കീറി
തൂവലുകൾ പരിശോധിച്ചവർ
ലാബിലെന്ന പോലെ;
ചുമരിൽ തൂക്കിയ
സാലിം അലി സാക്ഷി.
മയിൽപീലിക്കൊപ്പം
കാക്കത്തൂവൽ ?
ഗവേഷകന്റെ മകൻ
മുറുമുറുത്തു.
ഇപ്പോളിവിടെ കാക്കകളില്ല.
പലായനം ചെയ്ത
കാക്കകൾ ഇട്ടേച്ചു പോയ
തൂവലുകൾ മാത്രം!