Nishad Narayanan
Aspire Systems Kochi
വര
ആരോ വരച്ചു എൻ മുന്നിലായൊരു വര
ആരാലും കാണാത്തൊരദൃശ്യമാം കുറുവര
എന്നു തെളിഞ്ഞു എൻ കൺമുന്നിലീ വര
മായ്ച്ചിടാൻ പാടുപെടുന്നൊരീ തലവര
ആൺ കൂട്ടരൊത്തു ഞാൻ കൂട്ടുകൂടുന്നത്
നാട്ടിലുള്ളോരെല്ലാം സാക്ഷ്യപ്പെടുത്തണ-
മെന്നൊരു ചിന്ത മനസ്സിൽ നിറച്ചിട്ടു
എത്രകാലം ഞാൻ താണ്ടണമീ വര
ഒറ്റക്കെനിക്ക് പറക്കണമെന്നൊരു
ചിന്തയിൽ ഞാനെന്റെ ചിറകു തുഴയുവാൻ
തുനിയുന്ന നേരത്തെൻ തൂവൽ കരിച്ചിടും
ചുറ്റിലായുള്ളോർ തൻ കണ്ണിലെ തീവര
പാതിരാ മുട്ടുന്നതിൻ മുൻപ് തന്നെ ഞാൻ
കൂടണയേണമെന്നെന്നെ പഠിപ്പിച്ച
അലിഖിത നിയമത്തിനെന്നു തടയിടും
അന്നെന്റെ മുന്നിലായ് തെളിയുമെൻ നേർവര