Sangeetha G S
Speridian Technologies Pvt. Ltd
ധരണി സുന്ദരി
പുലർകാല ഭൂവിൻ ഭംഗിയെ
സ്വാഗതമരുളുംപോൽ മഞ്ഞണി-
ഞ്ഞണി നിരന്നു നിൽപ്പൂ മലനിരകൾ.
ഇളംവെയിലിൻ സുവർണ്ണകിരണങ്ങളാം
ചമയംപൂശി പുഞ്ചിരി തൂകി,
പുതുപുലരിയെ വരവേൽപ്പൂ ഭൂമി.
പവിഴംകണക്കെ തിളങ്ങുമാറ്
മഞ്ഞിൻമുത്തുക്കൾ ചൂടി,
പുഞ്ചിരി തൂകി നിൽപ്പൂ സുന്ദരപുഷ്പങ്ങൾ.
പുതുപുലരി തൻ സൗന്ദര്യം കണി-
കാണ്മതിന്നായി മധുരഗാനങ്ങളാൽ പാടി-
യുണർത്തും കോകിലങ്ങൾ.
പച്ചവിരിച്ചാരണ്യത്തിൻ ഭംഗി നുകർന്ന്
കാറ്റിൽ പാറിപ്പറക്കുമൊരു തൂവെള്ള-
പ്പുടവപോൽ ഒഴുകിപോം കാട്ടരുവികൾ.
ശാന്തമാം നിദ്രയെ ഭഞ്ജിച്ചുദിച്ചുയർന്ന
പ്രഭാതകിരണങ്ങളേറ്റ് ഉന്മേഷവതിയായി
ആനന്ദനൃത്തമാടിക്കളിപ്പൂ സാഗരത്തിരമാലകൾ.
ഹരിതാഭയാൽ വിളങ്ങിയിരുന്നൊരാ-
രണ്യത്തിൻ പച്ചപ്പെൻ ഭൂവിൽ നിന്നകലവേ,
ആ ഭംഗിയിനിയെന്നുമുണ്ടാമോ.